میرے غنیم نے مجھکو پیام بھیجا ہے
کہ حلقہ زن ہیں میرے گرد لشکری اُسکے
فصیل شہر کے ہر برج، ہر مینارے پر
کماں بدست ایستادہ ہیں عسکری اُسکے
وہ برق لہر بجھا دی گئی ہے جسکی تپش
وجود خاک میں آتش فشاں جگاتی تھی
بچھا دیا گیا بارود اسکے پانی میں
وہ جوئے آب جو میری گلی کو آتی تھی
سبھی دریدہ دہن اب بدن دریدہ ہوئے
سپرد دار و رسن سارے سر کشیدہ ہوئے
تمام صوفی و سالک، سبھی شیوخ و امام
امید لطف پہ ایوان کجلاہ میں ہیں
معززین عدالت حلف اٹھانے کو
مثال سائل مبرم نشستہ راہ میں ہیں
تم اہل حرف کے پندار کے ثنا گر ہو
وہ آسمان ہنر کے نجوم سامنے ہیں
بس اس قدر تھا کہ دربار سے بلاوا تھا
گداگران سخن کے ہجوم سامنے ہیں
قلندران وفا کی اساس تو دیکھو
تمھارے ساتھ ہے کون؟آس پاس تو دیکھو
تو شرط یہ ہے، جو جاں کی امان چاہتے ہو
تو اپنے لوح و قلم قتل گاہ میں رکھ دو
وگرنہ اب کہ نشانہ کمان داروں کا
بس ایک تم ہو، تو غیرت کو راہ میں رکھ دو
یہ شرط نامہ جو دیکھا، تو ایلچی سے کہا
اسے خبر نہیں تاریخ کیا سکھاتی ہے
کہ رات جب کسی خورشید کو شہید کرے
تو صبح اک نیا سورج تراش لاتی ہے
تو یہ جواب ہے میرا میرے عدو کے لیے
کہ مجھکو حرص کرم ہے نہ خوف خمیازہ
اسے ہے سطوت شمشیر پے گھمنڈ بہت
اسے شکوہ قلم کا نہیں ہے اندازہ
میرا قلم نہیں کردار اس محافظ کا
جو اپنے شہر کو محصور کر کے ناز کرے
میرا قلم نہیں کاسئہ کسی گداگر کا
جو غاصبوں کو قصیدوں سے سرفراز کرے
میرا قلم نہیں اوزار اس نقب زن کا
جو اپنے گھر کی چھت میں شگاف ڈالتا ہے
میرا قلم نہیں اس دزدِنیم شب کا رفیق
جو بے چراغ گھروں پر کمند اچھالتا ہے
میرا قلم نہیں تسبیح اس مبلغ کی
جو بندگی کا بھی ہر دم حساب رکھتا ہے
میرا قلم نہیں میزان ایسے عادل کی
جو اپنے چہرے پہ دوہرا نقاب رکھتا ہے
میرا قلم تو امانت ہے میرے لوگوں کی
میرا قلم تو عدالت میرے ضمیر کی ہے
اسی لیے تو جو لکھا تپاک جاں سے لکھا
جبھی تو لوچ کماں کا، زباں تیر کی ہے
میں کٹ گروں یا سلامت رہوں، یقیں ہے مجھے
کہ یہ حصار ستم کوئی تو گرائے گا
تمام عمر کی ایذا نصیبیوں کی قسم
میرے قلم کا سفر رائگاں نہ جائے گا۔۔۔۔
mere ghanim ne mujh ko payam bheja hai
ki halqa-zan hain mere gird lashkari us ke
fasil-e-shahr ke har burj har manare par
kaman-ba-dast sitada hain askari us ke
vo barq lahar bujha di gai hai jis ki tapish
vajud-e-ḳhak men atish-fishan jagati thi
bichha diya gaya barud us ke paani men
vo ju-e-ab jo meri gali ko aati thi
sabhi durida-dahan ab badan-darida hue
supurd-e-dar-o-rasan saare sar-kashida hue
tamam suufi o salik sabhi shuyuḳh o imaam
umid-e-lutf pe aivan-e-kaj-kulah men hain
moazzazin-e-adalat bhi half uThane ko
misal-e-sail-e-mubarram nashista raah men hain
tum ahl-e-harf ki pindar ke sana-gar the
vo asman-e-hunar ke nujum samne hain
bas ik musahib-e-darbar ke ishare par
gada-garan-e-suḳhan ke hujum samne hain
qalandaran-e-vafa ki asaas to dekho
tumhare saath hai kaun as-pas to dekho
so shart ye hai jo jaan ki amaan chahte ho
to apne lauh-o-qalam qatl-gah men rakh do
vagarna ab ke nishana kaman-daron ka
bas ek tum ho so ghairat ko raah men rakh do
ye shart-nama jo dekha to elchi se kaha
use ḳhabar nahin tariḳh kya sikhati hai
ki raat jab kisi ḳhurshid ko shahid kare
to subh ik naya suraj tarash laati hai
so ye javab hai mera mere adu ke liye
ki mujh ko hirs-e-karam hai na ḳhauf-e-ḳhamyaza
use hai satvat-e-shamshir par ghamanD bahut
use shikoh-e-qalam ka nahin hai andaza
mira qalam nahin kirdar us muhafiz ka
jo apne shahr ko mahsur kar ke naaz kare
mira qalam nahin kaasa kisi subuk-sar ka
jo ghasibon ko qasidon se sarfaraz kare
mira qalam nahin auzar us naqab-zan ka
jo apne ghar ki hi chhat men shigaf Dalta hai
mira qalam nahin us duzd-e-nim-shab ka rafiq
jo be-charagh gharon par kamand uchhalta hai
mira qalam nahin tasbih us maballigh ki
jo bandagi ka bhi har dam hisab rakhta hai
mira qalam nahin mizan aise aadil ki
jo apne chehre pe dohra naqab rakhta hai
mira qalam to amanat hai mere logon ki
mira qalam to adalat mere zamir ki hai
isi liye to jo likkha tapak-e-jan se likha
jabhi to loch kaman ka zaban tiir ki hai
main kaT girun ki salamat rahun yaqin hai mujhe
ki ye hisar-e-sitam koi to giraega
tamam umr ki iza-nasibiyon ki qasam
mere qalam ka safar raegan na jaega
sarisht-e-ishq ne uftadgi nahin paai
tu qadd-e-sarv na biini o saya-paimai
