Welcome To Urdu Shayari

Jab duniya ke but-khaano mein asnaam ki pooja jaari ho
Jab insaan ki azmat par ek pathar ka dam bhaari ho
Jab mann ki Jamna maeli ho aur rooh mein ek bezaari ho
Jab jhoot ke un bhagwaanon se imaan pe larza taari ho
Is haal mein hum deewaanon se tum kehte ho khaamosh raho

Jab masnad o mimbar pe baithi har ek nazar lalachati ho
Jab sirf dikhawe ki khaatir tasbih uthaayi jaati ho
Jab deen ke thekedaaron mein ek nafs-e-ammaara baaki ho
Be-zauq jahan pe sahiba ho, be-zauq jahan pe saaqi ho
Is haal mein hum deewaanon se tum kehte ho khaamosh raho

Jab ehl-e-khirad ki baaton par kuch jaahil shor machaate hon
Jab bulbul ho tasveer-e-chaman aur kawe geet sunaate hon
Jab chiriyon ke in ghoslon mein kuch saanp utaare jaate hon
Jab maali apne gulshan mein khud haath se aag lagaate hon
Is haal mein hum deewaanon se tum kehte ho khaamosh raho

Jab shaah ke ek ishaare par apnon mein niaazen bati hon
Jab aankhein gurbat maaron ki hasrat ka nazaara karti hon
Jab qalamen jaabir zaalim ki azmat ka qaseeda likhti hon
Jab haq ki baatein kehne pe insaan ki zubaanein katti hon
Is haal mein hum deewaanon se tum kehte ho khaamosh raho

Jab Misr ke un baazaaron mein Kin'aan ko becha jaata ho
Jab hirs o hawas ki mandi mein imaan ko becha jaata ho
Jab saum salaah ke parde mein Qur'an ko becha jaata ho
Jahan insaan ko becha jaata ho, Yazdaan ko becha jaata ho
Is haal mein hum deewaanon se tum kehte ho khaamosh raho

In andhe logon mein andhe eywaan ko izzat milti hai
Is haal mein kaise roshan se azhaan ko izzat milti hai
Yeh jahl nagar hai is mein to dhunwaan ko izzat milti hai
Mat soch ke aise aalam mein insaan ko izzat milti hai
Is haal mein hum deewaanon se tum kehte ho khaamosh raho

Yaan sooraj naam se nafrat hai sab raat ke hi gun gaate hain
Yaan raat pujaari zehnon par ek kaalik hi le aate hain
Yaan naam na le koi sooraj ka, ailan yahi ho jaate hain
Jo ek sharar ka maalik hai har jugnu ko dafnaate hain
Is daur mein hum deewaanon se tum kehte ho khaamosh raho

Yaan zindagi ke har goshe mein ek be-tarteeb tamasha hai
Har ek tamasha ke baahir is zaalim jahl ka haashiya hai
Tehzeeb-e-tasadum ke peeche ek jhoot ka dev taraasha hai
Insaan ke kaandhe pe dekho khud apna hi to laasha hai
Is daur mein hum deewaanon se tum kehte ho khaamosh raho

Jis daur mein Kaabe walon ko girja ke nazaare bhaate hon
Jis daur mein Mashriqi bhi Maghrib ke taraane gaate hon
Jis daur mein Muslim leader bhi kuch kehne se ghabraate hon
Jis daur mein subqat-e-ghairat ke asbaab adam ho jaate hon
Is daur mein hum deewaanon se tum kehte ho khaamosh raho

Hum ehl-e-haram hain ab hum se yeh kufr gawara kaise ho
Hum log "Anal-Haq" bolenge, hum log "Anal-Haq" bolenge

jinhen sahar nigal gai, vo ḳhvab DhunDhta huun main
kahan gai vo niind kii, sharab DhunDhta huun main

mujhe namak ki kaan men miThas ki talash hai
barahnagi ke shahr men libas ki talash hai

vo barf-bariyan huiin ki pyaas ḳhud hi bujh gai
main saġharon ko kya karun ki pyaas ki talash hai

ghira hua hai abr mahtab DhunDhta huun main
jinhen sahar nigal gai, vo ḳhvab DhunDhta huun main

kahan gai vo niind ki sharab DhunDhta huun main
jo ruk sake to rok do ye sail rang-o-nur ka

miri nazar ko chahiye vahi charaġh duur ka
khaTak rahi hai har kiran nazar men ḳhaar ki tarah

chhupa diya hai tabishon ne aa.ina shu.ur ka
nigah-e-shauq jal uThi hijab DhunDhta huun main

jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main

ye dhuup zard zard si ye chandni dhuan dhuan
ye tal.aten bujhi bujhi, ye daaġh daaġh kahkashan

ye surḳh surḳh phuul hain ki zaḳhm hain bahar ke
ye os ki phuvar hain, ki ro raha hai asman

dil o nazar ke motiyon ki aab DhunDhta huun main
jinhen sahar nigal gai vo ḳhvab DhunDhta huun main

kahan gai vo niind ki sharab DhunDhta huun main
ye talḳh talḳh rahaten, jarahaten liye hue

ye ḳhun-chakan latafaten kasafaten liye hue
ye taar taar pairahan urusa-e-bahar ka

ye ḳhanda-zan sadaqaten qayamaten liye hue
zamin ki tahon men aftab DhunDhta huun main

jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main

jo marhalon men saath the vo manzilon pe chhuT ga.e
jo raat men luTe na the vo dopahar men luT ga.e

magan tha main ki pyaar ke bahut se giit ga.unga
zaban gung ho gai, gale men giit ghuT ga.e

kaTi hui hain ungliyan rubab DhunDhta huun main
jinhen sahar nigal gai vo ḳhvab DhunDhta huun main

kahan gai vo niind ki sharab DhunDhta huun main
ye kitne phuul TuuT kar bikhar ga.e ye kya hua

ye kitne phuul shaḳhchon pe mar ga.e ye kya hua
baḌhi jo tez raushni chamak uThi ravish ravish

magar lahu ke daaġh bhi ubhar ga.e ye kya hua
inhen chhupa.un kis tarah naqab DhunDhta huun main

jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main

ḳhusha vo daur-e-be-ḳhudi ki justuju-e-yar thi
jo dard men surur tha to be-kali qarar thi

kisi ne zahr-e-ġham diya to muskura ke pi ga.e
taḌap men bhi sukun na thaa, ḳhalish bhi sazgar thi

hayat-e-shauq ka vahi sarab DhunDhta huun main
jinhen sahar nigal gai vo ḳhvab DhunDhta huun main

kahan gai vo niind ki sharab DhunDhta huun main
ḳhulus-e-be-shu.ur ki vo zud-etabariyan

vo shauq-e-sada-lauh ki hasin ḳham-kariyan
na.i sahar ke ḳhal-o-ḳhad, nigah men base hue

ḳhayal hi ḳhayal men, vo hashiya-nigariyan
jo de gaya fareb vo, shabab DhunDhta huun main

jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun main

vo la.al o lab ke tazkire, vo zulf o ruḳh ke zamzame
vo karobar-e-arzu vo valvale, vo hamhame

dil o nazar ki jaan tha vo daur jo guzar gaya
na ab kisi se dil lage na ab kahin nazar jame

samand-e-vaqt ja chuka rikab DhunDhta huun main
jinhen sahar nigal gai vo ḳhvab DhunDhta huun main

kahan gai vo niind ki sharab DhunDhta huun main
na ishq ba-adab raha, na husn men haya rahi

havas ki dhum-dham hai, nagar nagar, gali gali
qadam qadam khule hue hain makr-o-fan ke madrase

magar ye meri sadgi to dekhiye ki aaj bhi
vafa ki dars-gahon ka nisab DhunDhta huun main

jinhen sahar nigal gai vo ḳhvab DhunDhta huun main
kahan gai vo niind ki sharab DhunDhta huun men

bahut dinon men rasta harim-e-naz ka mila
magar harim-e-naz tak pahunch ga.e to kya mila

mire safar ke sathiyo! tumhin se puchhta huun main
batao kya sanam mile, batao kya ḳhuda mila

javab chahiye mujhe javab DhunDhta huun main
jinhen sahar nigal gai vo ḳhvab DhunDhta huun main

kahan gai vo niind ki sharab DhunDhta huun main

Sabaq Phir Parh Sadaqat Ka, Adalat Ka, Shujaat Ka
Liya Jaye Ga Tujh Se Kaam Dunya Ki Imamat Ka

Khuda'ay Lam Yazil Ka Dast-E-Qudrat Tu, Zuban Tu Hai
Yaqeen Paida Kar Ae Ghafil Ke Maghloob-E-Guman Tu Hai

Pare Hai Charakh-E-Neeli Faam Se Manzil Musalman Ki
Sitare Jis Ki Gard-E-Rah Hon, Woh Karwan Tu Hai

Makan Fani, Makeen Ani, Azal Tera, Abad Tera
Khuda Ka Akhiri Pegham Hai Tu, Javidan Tu Hai

Hina Band-E-Uroos-E-Lala Hai Khoon-E-Jigar Tera
Teri Nisbat Baraheemi Hai, Mamaar-E-Jahan Tu Hai

Teri Fitrat Ameen Hai Mumkanat-E-Zindagani Ki
Jahan Ke Johar-E-Muzmar Ka Goya Imtihan Tu Hai

Jahan-E-Aab-O-Gil Se Alam-E-Javed Ki Khatir
Nabuwat Sath Jis Ko Le Gyi Woh Armgahan Tu Hai

Sabaq Phir Parh Sadaqat Ka, Adalat Ka, Shujaat Ka
Liya Jaye Ga Tujh Se Kaam Dunya Ki Imamat Ka

zulmat ko ziya sarsar ko saba bande ko ḳhuda kya likhna
patthar ko guhar divar ko dar kargas ko huma kya likhna

ik hashr bapa hai ghar men dam ghuTta hai gumbad-e-be-dar men
ik shaḳhs ke hathon muddat se rusva hai vatan duniya-bhar men

ai dida-varo is zillat ko qismat ka likha kya likhna
zulmat ko ziya sarsar ko saba bande ko ḳhuda kya likhna

ye ahl-e-hashm ye dara-o-jam sab naqsh bar-ab hain ai hamdam
miT ja.enge sab parvarda-e-shab ai ahl-e-vafa rah ja.enge ham

ho jaan ka ziyan par qatil ko ma.asum-ada kya likhna
zulmat ko ziya sarsar ko saba bande ko ḳhuda kya likhna

logon pe hi ham ne jaan vaari ki ham ne hi unhi ki ġham-ḳhvari
hote hain to hon ye haath qalam sha.er na banenge darbari

iblis-numa insanon ki ai dost sana kya likhna
zulmat ko ziya sarsar ko saba bande ko ḳhuda kya likhna

haq baat pe koḌe aur zindan batil ke shikanje men hai ye jaan
insan hain ki sahme baiThe hain ḳhunḳhar darinde hain raqsan

is zulm-o-sitam ko lutf-o-karam is dukh ko dava kya likhna
zulmat ko ziya sarsar ko saba bande ko ḳhuda kya likhna

har shaam yahan sham-e-viran aseb-zada raste galiyan
jis shahr ki dhun men nikle the vo shahr dil-e-barbad kahan

sahra ko chaman ban kar gulshan badal ko rida kya likhna
zulmat ko ziya sarsar ko saba bande ko ḳhuda kya likhna

ai mere vatan ke fankaro zulmat pe na apna fan vaaro
ye mahl-saraon ke baasi qatil hain sabhi apne yaaro

virse men hamen ye ġham hai mila is ġham ko naya kya likhna
zulmat ko ziya sarsar ko saba bande ko ḳhuda kya likhna

tum ne jab zulf-e-pareshan ko sanvara hoga
sadqa-e-husn ghaTaon ne utara hoga

aap ki chashm-e-karam ka jo ishara hoga
auj par mere muqaddar ka sitara hoga

sang-dil tere bhi aansu nikal aa.e honge
Dubne vaale ne jab tujh ko pukara hoga

main ne ilzam ḳhushi se liye sab apne sar
aap badnam huun ye kis ko gavara hoga

kuchh to qismat ki hai sazish miri barbadi men
aur kuchh un ki bhi nazron ka ishara hoga

kya ġharaz us ko zamane ki ḳhushi se 'danish'
yaar ka ġham hi jise jaan se pyara hoga

Ye jugnuon ki qayaadat me chalne waale log,
They kal charaagh ki maanind jalne waale log.

Hamein bhi waqt ne patthar sifat bana daala,
Hamein they mom ki soorat pighalne waale log.

Hameen ne apne charaaghon ko pamaal kiya,
Hameen hain ab kaf-e-afsos milne waale log.

Simat ke rah gaye maazi ke dastaanon tak,
Hudood-e-zaat se aage nikalne waale log.

Sitam to ye ke hamari safon mein shaamil hain,
Chiraagh bujhte hi khema badalne waale log.

Hamare daur ka Firaun doobta hi nahin,
Kahan chale gaye paani par chalne waale log.

Rahti hai bandagi me zarurat gunah ki
Insan warna apna parastar ho na jaye 

Khilte hain dil mizah se jaise saba se gul 
Lekin kahin ye tanz se talwar ho na jaye 

Fursat mili jo takziya-e-nafs ke lye 
Wo sarf-e-nukta chiniye aghyar ho na jaye 

Daulat ne paya hai is zamane me ye urooj 
Tahzeeb nazr-e-dirham-o-deenaar ho jaye