Welcome To Urdu Shayari

nahin ishq mein is ka to ranj hamen ki qarar o shakeb zara na raha
gham-e-ishq to apna rafiq raha koi aur bala se raha na raha

diya apni khudi ko jo ham ne utha wo jo parda sa bich mein tha na raha
rahe parde mein ab na wo parda-nashin koi dusra us ke siva na raha

na thi haal ki jab hamen khabar rahe dekhte auron ke aib o hunar
padi apni buraiyon par jo nazar to nigah mein koi bura na raha

tire rukh ke khayal mein kaun se din uthe mujh pe na fitna-e-roz-e-jaza
tiri zulf ke dhyan mein kaun si shab mire sar pe hujum-e-bala na raha

hamen saghar-e-bada ke dene mein ab kare der jo saqi to hae ghazab
ki ye ahd-e-nashat ye daur-e-tarab na rahega jahan mein sada na raha

kai roz mein aaj wo mehr-liqa hua mere jo samne jalva-numa
mujhe sabr o qarar zara na raha use pas-e-hijab-o-haya na raha

tire khanjar o tegh ki ab-e-rawan hui jab ki sabil-e-sitam-zadgan
gae kitne hi qafile khushk-zaban koi tishna-e-ab-e-baqa na raha

mujhe saf batae nigar agar to ye puchhun main ro ro ke khun-e-jigar
male panv se kis ke hain dida-e-tar kaf-e-pa pe jo rang-e-hina na raha

use chaha tha main ne ki rok rakhun miri jaan bhi jaae to jaane na dun
kiye lakh fareb karod fusun na raha na raha na raha na raha

lage yun hi hazaron hi tir-e-sitam ki tadapte rahe pade khak pe ham
wale naz o karishma ki tegh-e-do-dam lagi aisi ki tasma laga na raha

'zafar' aadmi us ko na janiyega wo ho kaisa hi sahab-e-fahm-o-zaka
jise aish mein yad-e-khuda na rahi jise taish mein khauf-e-khuda na raha

Har tarah ke jazbaat ka elaan hain aankhein
Shabnam kabhi sho'ala, kabhi toofaan hain aankhein

Aankhon se badi koi taraazu nahin hoti
Tulta hai bashar jis mein, woh meezaan hain aankhein

Aankhein hi milaati hain zamaane mein dilon ko
Anjaan hain hum-tum agar anjaan hain aankhein

Lab kuchh bhi kahein, is se haqeeqat nahin khulti
Insaan ke sach-jhooth ki pehchaan hain aankhein

Aankhein na jhukein teri kisi ghair ke aage
Duniya mein badi cheez meri jaan, hain aankhein

Tum apna ranj-o-gham apni pareshani mujhe de do
Tumhein gham ki qasam, is dil ki veerani mujhe de do

Ye maana main kisi qaabil nahin hoon in nigaahon mein
Bura kya hai agar ye dukh, ye hairani mujhe de do

Main dekhun to sahi duniya tumhein kaise satati hai
Koi din ke liye apni nigahbani mujhe de do

Vo dil jo main ne maanga tha magar ghairon ne paaya hai
Badi shai hai agar us ki pashemani mujhe de do

Ye zulf agar khul ke bikhar jaaye to achchha
Is raat ki taqdeer sanwar jaaye to achchha

Jis tarah se thodi si tere saath kati hai
Baaqi bhi usi tarah guzar jaaye to achchha

Duniya ki nigaahon mein bhala kya hai bura kya
Ye bojh agar dil se utar jaaye to achchha

Waise to tumheen ne mujhe barbaad kiya hai
Ilzaam kisi aur ke sar jaaye to achchha

Main zindagi ka saath nibhata chala gaya
Har fikr ko dhuen mein udata chala gaya

Barbadiyon ka sog manana fuzool tha
Barbadiyon ka jashn manata chala gaya

Jo mil gaya usi ko muqaddar samajh liya
Jo kho gaya main us ko bhulata chala gaya

Gham aur khushi mein farq na mehsoos ho jahan
Main dil ko us maqam pe laata chala gaya

Kabhi khud pe, kabhi halaat pe rona aaya
Baat nikli to har ek baat pe rona aaya

Hum to samjhe the ki hum bhool gaye hain unko
Kya hua aaj ki kis baat pe rona aaya

Kis liye jeete hain hum, kis ke liye jeete hain
Barha aise sawaalaat pe rona aaya

Kaun rota hai kisi aur ki khaatir, ae dost
Sab ko apni hi kisi baat pe rona aaya

Na mandir mein sanam hote, na masjid mein Khuda hota
Hami se ye tamasha hai, na hum hote to kya hota

Na aisi manzilein hotin, na aisa rasta hota
Sambhal kar hum zara chalte, to aalam zer-e-pa hota

Ghata chhati, bahar aati, tumhara tazkira hota
Phir us ke baad gul khilte, ke zakhm-e-dil hara hota

Zamane ko to bas mashq-e-sitam se lutf lena hai
Nishane par na hum hote, to koi doosra hota

Tere shan-e-karam ki laaj rakh li gham ke maaron ne
Na hota gham to is duniya mein har banda Khuda hota

Musibat ban gaye hain ab to ye saanson ke do tinke
Jala tha jab to poora aashiyana jal gaya hota

Hamein to doobna hi tha, ye hasrat reh gayi dil mein
Kinare aap hote aur safeena doobta hota

Are o jeete-jee dard-e-judai dene wale, sun
Tujhe hum sabr kar lete, agar mar ke juda hota

Bula kar tum ne mehfil mein hamein ghairon se uthvaya
Hami khud uth gaye hote, ishara kar diya hota

Tere ahbab tujh se mil ke phir mayus laut aaye
Tujhe "Naushad" kaisi chup lagi, kuchh to kaha hota