ye tabiyat hai to Khud aazaar ban jaayenge ham
chaaraagar royenge aur Gham_Khaar ban jaayenge ham
ham sar-e-chaak-e-vafaa hain aur teraa dast-e-hunar
jo banaa degaa hamen ai yaar ban jaayenge ham
kyaa Khabar thi ai nigaar-e-sher tere ishq men
dil_baraan-e-shahar ke dil_daar ban jaayenge ham
saKht jaan hain par hamaarii ustavaarii par na jaa
aise TuuTenge teraa iqaraar ban jaayenge ham
aur kuchh din baiThane do kuu-e-jaanaaN men hamen
raftaa raftaa saayaa-e-divaar ban jaayenge ham
is qadar aasaaN na hogii har kisii se dostii
aashnaa_ii men teraa mayaar ban jaayenge ham
mir-o-Ghaalib kyaa ke ban paaye nahin faiz-o-firaaq
zam ye thaa ruumi-o-ataar ban jaayenge ham
dekhane men shaaKh-e-gul lagate hain lekin dekhanaa
dast-e-gul_chiin ke liye talvaar ban jaayenge ham
ham chiraaGon ko to taariikii se laDanaa hai 'Faraz'
gul hue par subah ke aasaar ban jaayenge ham
Writer
